…Padamelan Abdi…
Geus poe Juma’ah euy! Geus hayang gancangan balik urang teh, ti tatadi ngan ceting (chatting) jeung si Neneng jeung bolak balik mukaan prenster hungkul. Nepika geus arapal tah statusna barudak teh. Nu lebar mah si Meta euy, geus kaburu jadian jeung si Atang. Bebel teh. Padahal ku urang geus dimonitor terus eta status si Meta, angger we keneh urang kacolongan. Nasib.. nasibbb… Lah, paduli teuing lah. Masih aya keneh Anggi, Mona, jeung Dewi. Urang kudu merenahan sistim monitoring urang yeuh. Maenya kapiheulaan wae tuluy ku batur? Tara dialajar ngantri atawa kumaha batur teh? Dodol…!
Geura urang tingali. Pilem naon wae nu maen peuting ieu nya? Open new window. Sinema 21 dot com. Walah.. Tah ieu.. Haha.. Pas pisan yeuh. "Janji Pocong Perawan Titisan Berdarah Biru". Waah. Pas pisan. Urang teh geus jangjian jeung si Neneng. Pan wiken cenah, rek nga-date atuh urang oge. Maenya eleh wae ku batur. Ah ku urang rek diajakan lalajo nu ieu we. Pan lumayan engke mun pas si Neneng sieuneun, urang bisa kabagean saeutik-saeutik lah. Hahaha.. Kudu aya make strategi atuh dul.. Siga urang kieu tah. "Dadang…" Ke heula.. Naha asa aya nu manggilan nya?
"Dang.. Euy, Dadang"
*Gelepokkk…*
Duh gusti… Hulu aing, si dudul teh. Saha nu wawanianan nga..
"Eh, Bapa. Nyauran abdi, Pa?"
Si Bos euy. Belegug teh hulu urang diteke!
"Enya, ti tatadi urang ngageroan maneh teh. Ari maneh teh keur digawe atawa naon?"
"Sumuhun Pa.. Ieu abdi teh atos ti enjing da didamel terus atuh. Nepi ka pareurih ieu panon teh. Punduk oge cararangkeul. Asa tos haseupan ieu mastaka abdi oge, seueur teuing dipake mikir panginten"
"Heueuh.. Huntu maneh tah. Ari tadi siah muka website bioskop. Sangka urang teu merhatikeun? Eta naon deui, window messenger aya dalapan kitu? Ari maneh teh digawe atawa arisan di dieu teh? Eta naon deui..? Oh, keur ngirim-ngirim lamaran gawean maneh teh? Alus pisan maneh teh Dadang"
Euleuh siah, aing kanyahoan. Aduuuhh si Bapa teh, ari rek jul jol teh ngomong-ngomong heula atuh. Jadi urang na pan bisa rada siap-siap. Ieu mah nyaho-nyaho geus aya di tukangeun urang. Dodol teh.
"Sanes Pa, eta mah abdi nuju ngadamel riset. Kumaha upami perusahaan kompetitor teh ngadamel strategi penjualanana. Bilih we aya nu bisa kapake strategi na ku perusahaan urang. Teras eta nu window messenger mah abdi kirang terang. Leres, Pa. Da abdi mah tara ceting. Terang-terang teh aya kabarukaan we eta window na teh. Batur heulaan panginten nu ngirim-ngirim mesej ka abdi"
"Heueuh, alus… Ngawadul we terus. Sangka maneh teh urang gede di leuweung jadi gampang dibohongan? Yeuh. Ari barang nu anyar asup gudang geus disetok encan? Ieu teh geus poe Juma’ah. Jam opat engke kabeh geus kudu asup di database nya?!"
Alah siah.. Aing poho. Ti tadi urang teh ngeunah we ngagodaan si Neneng. Aya barang anyar datang geuning. Euh, aing mah, maenya lembur deui mah peuting ieu? Kumaha acara lalajo jeung si Neneng.. Bakuuulll.. bakulll… Gagal deui gagal deui..
"Oh sumuhun, ieu oge nuju dipidamel ku abdi. Bapa mah tenang wae. Terang-terang engke database na janten lengkap we. Serahkeun we ka abdi. Da abdi mah nu pang kompetenna di antara pegawe nu sejen teh"
"Alus. Pupuji maneh we. Geus ditu gawekeun. Urang mah pokona nyahona jam opat kabeh geus beres!"
Heueuh maneh, ngeunah we ngomong. Sok atuh gawekeun sorangan? Mun bisa anggeus jam opat, teukteuk tah ceuli urang. Aing ayeuna nu kudu puk pek. Kudu lembur deui. Paling henteu nepika jam dalapan. Rek terus lalajo, pasti barau kesang da urang. Geus kitu bakal tunduh deui. Bisa-bisa urang sare pas lalajo engke. Heuhh.. Neneng, neneng.. Aa teh punten. Sanes teu hoyong da. Ari hayang mah hayang. Tapi da garis nasib teh geus ti dituna sigana.
